De ole „Bergedorf“ is’n Restaurant

De nächste Fährstation is de Museumshoben Övelgönne, wo de Iisbrecker „Stettin“, dat oole Füerschipp „Elbe 3“ un ook dat freuhere Hadag-Schipp „Bergedorf“ to seh’n sünd. Hier is’n Restaurant binnen, wo man fein to Mittag eeten oder Kaffee un Koken geneeten kann. Sowat is an Land natürlich ook meuglich, wo dicht an Stroot un Woter noch veele oole Hüser stoht, in de freuer, as dat noch ruhig un idyllisch weur, pangschoneerte Lotsen wohnt hebbt. In uns’ Tied heuert man bannig dann’ Larm vun anner Siet ut’n Container-Hoben. Spaziert man noch’n Stück wieder, kummt man bi dann’ „oolen Schweden“ an, een groten Felsblock, dann man bi’t Baggern ut de Elv ruthoolt un 1999 hier upstellt hett. Geologen hebbt em ünnersocht un meent, dat he woll Twee- bet Dreehunnertdusend Johr old un üm un bi vör twindigdusend Johr mit dat Gletscheriis ut Skandinavien hierher wandert is. De Steen is öber dree Meter hoch un wiggt 217 Tonnen.

aus der Zeitung „De Latücht“ (die Laterne)